Etnografia shqiptare është e pasur dhe e larmishme. Çdo trevë dhe krahinë e plotëson këtë gjerdan kulturor me veshjet dhe kostumet e tyre popullore, sa të vecantë, aq edhe të bukur.
Kostumi popullor i krahinës së Lunxhërisë është një prej kostumeve më të bukur të këtij koleksioni. Një krenari shqiptare e kulturës tonë të pasur, të trashëguar brez pas brezi. Veshjet me pamje aristokrate, të punuara e të zbukuruara me fije ari, me pulla e me sumbulla, i japin këtij kostumi një hijeshi rrëzëllitëse.
Kostumi i Lunxhërisë mendohet të jetë të paktën 2.000 vjeçar. Në fakt, zona e Lunxhërisë është e mbushur me vendbanime të lashta, mes të cilave kryeqendra e Epirit të lashtë, Antigonea, qyteti i ndërtuar nga Pirro i Epirit. Kjo zonë e banuar hershëm me qytetërime të zhvilluara, natyrisht që ka krijuar dhe ka trashëguar kulturën e saj brez pas brezi, deri në ditët tona, mes tyre edhe kostumin tradicional lunxhiot.
Sot kostumet lunxhiote originale, të punuar sipas teknikave të vjetra, janë të rrallë. Këto kostume trashëgohen brez pas brezi, nga nënat te bijat, dhe ruhen me devotshmëri maniakale prej tyre. Kostumet kanë vlerë të pallogaritshme, si monetare, ashtu edhe shpirtërore, për zotëruesit e tyre, por edhe per kulturën shqiptare ne tërësi.
