14 vjetori i pavarësisë të vonuar të Kosovës

14 vite më parë, më 17 shkurt 2008, Kosova do të shpallte pavarësinë e saj, pas vitesh e dekadash shtypje e genocidi. Në orën 15:39 të asaj dite, në Kuvendin e Republikës së Kosovës në Prishtinë, në një mbledhje të jashtëzakonshme, ku merrnin pjesë 109 nga gjithsej 120 deputetë, Kuvendi i Kosovës njëzëri shpalli Kosovën shtet të pavarur, sovran dhe demokratik.

Ky akt i vetvendosjes së popullit kosovar, i cili buron nga parimi ndërkombëtar i Vetvendosjes së Popujve, vendosi në vend një të drejtë të mohuar një shekull më parë, kur në Konferencën e Ambasadorëve në Londër, fuqitë e mëdha Evropiane i shkëputën pa të drejtë trojet dardane prej shtetit të sapo formuar shqiptar dhe benë pazare me to duke ua falur fqinjëve lakmitarë.

Ashtu sikurse kishte ndodhur në të gjitha trojet e banuara historikisht prej shqiptarëve, edhe në trevat Kosovare, më 28 nëntor 1912 u ngrit flamuri shqiptar, flamuri i kuq me shqiponjen dykrenare, flamuri i Kastriotëve, dhe u shpall pavarësia prej sundimit 500 vjeçar otoman.

Shteti i sapo formuar shqiptar, me kyeministër Ismail bej Vlorën dhe atdhetarë nga të gjitha trevat shqiptare ne përbërje të tij, përfshinte gjithë trevat shqiptare, në të cilat populli me vullnetin e vet dhe me parimin e vetvendosjes kishte shpallur pavarësinë prej pushtuesve dhe kishte nënëshkruar deklaratën e formimit të shtetit sovran Shqiptar.

Por kjo e drejtë e përbotshme iu refuzua pabesisht shqiptarëve prej pazareve të shtetëve të fuqishme Evropiane gjatë konferencave me diplomatë e ambasadorë. Trojet e Shqipërisë u copëtuan dhe u falën si suvenire. Gjysma e shqiptarëve u kthye pësëri nën sundimin e pushtuesve, tashmë në një formë të re; pushtues të legalizuar nga traktate konferencash.

Gati 100 vite më vonë, shtetet Evropiane arnuan një gabim historik të kryer ndaj popullit shqiptar. Duke mbështetur të drejtën e vetvendosjes të popullit kosovar dhe Pavarësinë e Kosovës, i ktheu kështu të drejtën e mohuar në Konferencen e Londrës në vitin 1913.

14 vite më parë Kosova shpalli pavarësinë e saj.
Pavarësi e vonuar! Pavarësi e shumëpritur!
Gëzuar lirinë e pavarësinë Kosovë.

Lexo edhe:

• Si u copëtuan trojet shqiptare gjatë viteve 1912-1920
• Evropa e sabotoi historinë tuaj në Shekullin XIX, kur Ilirinë e quajti Ballkan