Kunadhja Leshverdhë, një nga perlat e folklorit shqiptar, kënduar nga Laver Bariu dhe Sazet e Përmetit

Sazet e Përmetit kanë lënë gjurmë të pashlyer në fondin e artë të folklorit shqiptar. Janë të panumërta këngët dhe pjesët muzikore që ky grup artistik ka krijuar përgjatë viteve. Janë të gdhendur në memorjen tonë kolektive emrat e artistëve që kanë performuar në këtë ansambel të jashtëzakonshëm.

Laver Bariu është një prej përfaqësuesve ekselent të Sazeve të Përmetit. Ai ka qenë pjesë e këtij ansambli gjatë gjithë jetës së tij artistike, si klarinetist, si këngëtar dhe si drejtues artistik, për mëse 40 vjet.

I dekoruar me titullin Artist i Popullit, Laver Bariu ka lënë pas një trashëgimi të vyer në folklorin shqiptar, me këngë dhe kaba të ndryshme. Një prej këngëve më të dashura prej tij dhe më të pëlqyera prej publikut është “Kunadhja leshverdhë”, e kënduar nga Laver Bariu, sëbashku me Sulejman Lamen, dhe shoqëruar nga instrumentistët e Sazeve të Përmetit.